RIMAYNIKU... Envio de Ridei.... Pero, y los que no sabemos quechua... que hacemos?

Escribió:
De: "Ridei" - ridei@pucp.edu.pe

KILLAPI, PIRUW SUYUNCHIKPA RIMANAKUNAN WASIPI CHIQNINAKUY YAPA RIKURIMUSQANTA YUYARISPA, ISKAY SIMI KAWSAYPURA YACHANAPI HUÑUNAKUSQA AMAWTAKUNAWAN YACHAKUQKUNA, WAKIN AWYA YALA LLAQTAMASIYKUNAMAN KAYTA NIYKAMUYKICHIK:

1. 5 punchaw, chakra yapuy killapi, lliw Awya Yala warmikunapa hatun punchawnin karqa kay llaqtanchikpi. Manam qawanakunapi, wayra wasikunapi ni yachay wasikunapi , chay punchawta pipas yuyaykunchu. ¿Imansaqa? Qichwa, aymara, shipiwu, ashaninka, mapuchi, astika, maya warmikuna kaptinchiki.
2. 6 punchaw, chakra yapuy killapi, Pirúw suyunchikpa huñunakunan hatun wasipi yapamanta mamaku Martha Hildebrandt llaqta nanachikuq paninchikta (María Sumiri) kamipayta qallaykun.
3. Kay mamakucha Martha Hildebrandt ancha chiqnikuywanmi llaqtanchikkunapa siminkuna hatun kamachikuywan riqsisqaña kananta harkakun. Paypa umanmanhinaqa runa siminchikqa aswan qipamansi llaqtamasinchikkunata aysan, aswansi warmakunatapas yachay wasikunapi asnuyachin. Kay rikchaq simikunata rimaspam chay siminchikkuna allinninpaq kaq hatun kamachikuna chaskisqaña kachkaptin takyarqachin.
4. Chaymi ñuqaykuqa kay Pirúw suyunchik ukunpi rimakusqan siminchikkuna kallpachakunanpaq, wiñananpaq, rimasqa kananpaq, riqsisqa kananpaq hatun kamachikuy qillqakunanta munaniku, chaytam mañakuniku.
5. Llaqtanchikpa siminkunaqa lliw llamkana wasikunapi rimasqam kanan; lliw llamkana wasikunapi llamkaqkunam llaqtapa siminta rimastin llamkananku.
6. Kay Pirúw suyunchikpa huñunakunan wasipiqa manam kastilla simillawanqa lliwchankuqa rimanakunmankuchu, runa simipi, aymara simipi yunka simikunapipas rimanakunankum, kay simikunapas kastilla simiwan sayaypurallam.
7. Chaymi, 6 punchaw kay killapi, mamakucha Martha Hildebrandt chiqnikuy simiwan lliw rimasqanta qipachaniku. Ñuqaykuqa llaqtaykupa siminta kuyakunikum, ñuqaykuqa llaqtaykupa siminwan rimanakunikum, ñuqaykuqa churiykutapas, wawaykutapas, yachakuqkunatapas taytamamaykupa siminkunata yachachichkanikum. Manam rimayllachu rimaniku. Ancha yachayniyuq runakupa nisqanmahinaqa, simikuna hamutaq runakuna nisqanmanhinaqa manam mayqin simipas kuraqchu, manam mayqin simipas sullkachu, lliwchankum sayaypuralla, lliwchankum manaraq qillqakuchkaptinku rimasqa karqa.
8. Kaykunata nispaykum paninchik, ñañanchik María Sumirita hinaspa Hilaria supata, hinallataq, kay Pirúw suyunchikpa hatun huñunakuna wasipi llamkaqkunatapas, huk siminchikkuna amachaq runakunatapas kay quñi llaqtamanta "qamkunawnami kachkaniku" nispa nimuykiku.
9. Amaña huk Martha Hildebranqa rikurimuchunñachu, kay rikchaq umayuq warmikunaqa, runakunaqa tukunanñam. Chayna chiqnikuq, qipachakuq, rakiq runakunaqa tukunanñam. Manañam llaqta puchukaq runakunapa kawsayninpiñachu kachkanchik. Manañam maqakuspa, wañuchispa, kawsayninchik, yachayninchik, iñiyninchik tikrachiq runakunaqa kanmanñachu.

Kay rimayniykutam Wanta llaqtapi llamkaq, yachakuq warmi qarikuna qillqaykamuniku.

Kawsachun runa siminchik
Kawsachun aymara siminchik
Kawsachun yunka siminchikkuna
Kawsachun qichwa llaqtanchik
Kawsachun Awya Yala llaqtanchikkuna.

Wanta, 10, chakra yapuy killa 2007 watapi.